Dilawar Ali Aazar
ajiib rang ajab haal men paḌe hue hain
ham apne ahd ki patal men paḌe hue hain
suḳhan-sara.i koi sahl kaam thoḌi hai
ye log kis liye janjal men paḌe hue hain
uTha ke haath pe duniya ko dekh sakta huun
sabhi nazare bas ik thaal men paḌe hue hain
jahan bhi chahun main manzar uTha ke le ja.un
ki ḳhvab dida-e-amval men paḌe hue hain
main shaam hote hi gardun pe Daal aata huun
sitare lipTi hui shaal men paḌe hue hain
vo tu ki apne ta.iin kar chuka hamen takmil
ye ham ki fikr-e-ḳhad-o-ḳhal men paḌe hue hain
isi liye ye vatan chhoḌ kar nahin jaate
ki ham tasavvur-e-‘iqbal’ men paḌe hue hain
savab hi to nahin jin ka phal milega mujhe
gunah bhi mire a.amal men paḌe hue hain
tamam aks miri dastaras men hain ‘azar’
ye aa.ine miri timsal men paḌe hue hain
Leave a Reply