meri qismat ki vo ab hain mire gham-ḳhvaron men
kal jo shamil the tire hashiya-bardaron men
zahr ijad karo aur ye paiham socho
zindagi hai ki nahin dusre sayyaron men
kitne aansu hain ki palkon pe nahin aa sakte
kitni ḳhabren hain jo chhapti nahin aḳhbaron men
ab to dariya ki tabi.at bhi hai girdab-pasand
aur vo pahli si sakat bhi nahin patvaron men
aap ke qasr ki janib koi dekhe tauba
jurm sabit ho to chun dijiye divaron men
aaj tahzib ke tevar bhi hain caron jaise
dafan ho jaa.e na kal apne hi ambaron men
apni avaz ko bhi kaan taraste hain mire
jins-e-guftar liye phirta huun bazaron men
tohmaten hazrat-e-insan pe na dhariye ‘anvar’
dushmani hai ki chali aati hai talvaron men
Leave a Reply