Yun Dil-E-Diwana Ko Aksar Saza Deta Hun Main

yuuñ dil-e-dīvāna ko aksar sazā detā huuñ maiñ

apnī barbādī pe ḳhud hī muskurā detā huuñ maiñ

apne dil ke ḳhuun se vo gul khilā detā huuñ maiñ

regzāroñ ko gulistāñ kī adā detā huuñ maiñ

aisī manzil par mujhe pahuñchā diyā hai ishq ne

merā jo qātil hai us ko bhī duā detā huuñ maiñ

kyuuñ kisī kā naam le kar ishq ko rusvā karūñ

apne dil kī aag ko ḳhud hī havā detā huuñ maiñ

zikr yuuñ kartā huuñ apne ġham kā apne dard kā

hosh vāloñ ko bhī dīvāna banā detā huuñ maiñ

kyā guzartī hai mire dil par ḳhudārā kuchh na pūchh

dushmanoñ ko jab talak ghar kā patā detā huuñ maiñ

apnī hī āvāz ḳhud lagtī hai mujh ko ajnabī

jab akele meñ kabhī tujh ko sadā detā huuñ maiñ

nashtar-e-yād-e-ġham-e-jānāñ se ‘qaisar’ in dinoñ

zaḳhm jo sote haiñ un ko phir jagā detā huuñ maiñ

Leave a Comment