Yun Dil-E-Diwana Ko Aksar Saza Deta Hun Main

Qaisar Siddiqi

yuun dil-e-divana ko aksar saza deta huun main

apni barbadi pe ḳhud hi muskura deta huun main

apne dil ke ḳhuun se vo gul khila deta huun main

regzaron ko gulistan ki ada deta huun main

aisi manzil par mujhe pahuncha diya hai ishq ne

mera jo qatil hai us ko bhi dua deta huun main

kyuun kisi ka naam le kar ishq ko rusva karun

apne dil ki aag ko ḳhud hi hava deta huun main

zikr yuun karta huun apne gham ka apne dard ka

hosh valon ko bhi divana bana deta huun main

kya guzarti hai mire dil par ḳhudara kuchh na puchh

dushmanon ko jab talak ghar ka pata deta huun main

apni hi avaz ḳhud lagti hai mujh ko ajnabi

jab akele men kabhi tujh ko sada deta huun main

nashtar-e-yad-e-gham-e-janan se ‘qaisar’ in dinon

zaḳhm jo sote hain un ko phir jaga deta huun main