miT Nahin Sakta Qayamat Tak Nishan-E-Arzu

Talib Baghpati

miT nahin sakta qayamat tak nishan-e-arzu

husn jism-e-arzu hai ishq jan-e-arzu

vo sunen siine se lag kar dastan-e-arzu

dil ki har avaz hoti hai zaban-e-arzu

be-ḳhudi ki manzilon men sarf-e-hairat ho gaya

dil ki le de kar bacha tha ik nishan-e-arzu

be-qarari be-ḳhudi bechargi divangi

hain ye unvanat-e-zeb-e-dastan-e-arzu

ho chuki roz-e-azal vabastagi-e-huns-o-ishq

ek jan-e-arzu hai ik jahan-e-arzu

un ki duzdida nigahon men ye kya e.ajaz tha

ji uThe ek-bargi sab kushtagan-e-arzu

ho chale un ke lab-e-nazuk tabassum-ashna

barq se kab tak bachega ashiyan-e-arzu

zindagi mere liye ‘talib’ saza-e-ishq hai

meri hasti hai mujassam dastan-e-arzu