vo jitne duur hain utne hi mere paas bhi hain
ye aur baat hai ḳhush hain magar udaas bhi hain
ye dekhna hai hamen kis ka zauq kaisa hai
yahan sharab bhi hai zahr ke gilas bhi hain
unhi pe tohmat-e-divangi lagate ho
jo ittifaq se mahfil men ru-shanas bhi hain
jo raushni ke libade ko oḌh kar aa.e
shab-e-siyah ke vo matami libas bhi hain
tum apne shahr men amn-o-aman ki baat karo
jahan sukun hai vahan log bad-havas bhi hain
ghazal ke saaz hain faiz-ul-hasan-‘ḳhayal’ jahan
vahan pe aah ba-lab bhi hain mahv-e-yas bhi hain
Leave a Reply