Shoaib Nizam
naḳhl-e-dua kabhi jab dil ki zamin se nikle
saa.e bhi kuchh guman ke barg-e-yaqin se nikle
nazren jama.e rakhna ummid ke khanDar par
mumkin hai ab ke suraj us ki jabin se nikle
ḳhud se farar itna asan bhi nahin hai
saa.e karenge pichha koi kahin se nikle
zaḳhmi ana ko yuun main har baar chheḌta huun
musbat sa ik ishara shayad kahin se nikle
ungli men jab bhi us ne angushtari ghuma.i
kya kya hasin paikar aks-e-nagin se nikle
Leave a Reply