Insha Allah Khan Insha
achchha jo khafa ham se ho tum ai sanam achchha
lo ham bhi na bolenge khuda ki qasam achchha
mashghul kiya chahiye is dil ko kisi taur
le levenge dhund aur koi yaar ham achchha
garmi ne kuchh aag aur bhi siine men lagai
har taur gharaz aap se milna hi kam achchha
aghyar se karte ho mire samne baten
mujh par ye lage karne naya tum sitam achchha
ham moatakif-e-khalvat-e-but-khana hain ai shaikh
jaata hai to ja tu pae-tauf-e-haram achchha
jo shakhs muqim-e-rah-e-dildar hain zahid
firdaus lage un ko na bagh-e-iram achchha
kah kar gae aata huun koi dam ko abhi main
phir de chale kal ki si tarah mujh ko dam achchha
is hasti-e-mauhum se main tang huun ‘insha’
vallah ki is se ba-maratib adam achchha
Leave a Reply