ud kar suragh-e-kucha-e-dilbar lagaiye
kis tarah donon bazuon men par lagaiye
ik tiir dil par ek jigar par lagaiye
hissa lagaiye to barabar lagaiye
phulon men topiye mujhe nazuk-dimagh huun
lillah is lahad men na patthar lagaiye
jab bazm-e-yar men hai takalluf rasai ka
khalvat-sara-e-khas men bistar lagaiye
har dam kiya kare rag-e-jan marhaba ka shor
is nok-jhonk se koi nashtar lagaiye
barson se be-qarar hai taskin ke liye
jhukiye zara jigar se mire sar lagaiye
kya bastani qafas ki ye bulbul ko bhejiye
hisse men us ke phulon ki chadar lagaiye
ja apne dil men dijiye mujh saf-qalb ko
aine men shabih-e-sikandar lagaiye
yavar nasib ho to hasinon ko chahiye
dil un se aazma ke muqaddar lagaiye
aksar vo kahte hain ki jo bosa talab kare
is guftugu pe munh ise kyunkar lagaiye
aae dahan-e-zakhm se avaz aur aur
is is ada-o-naz se khanjar lagaiye
purze mire udaiye bheja hai main ne khat
be-jurm kyuun kabab-e-kabutar lagaiye
surat jo ek ek ki takta hai aaina
hasrat ye hai suragh-e-sikandar lagaiye
hain aap to tamam khudai ke nakhuda
mera jahaz bhi lab-e-kausar lagaiye
barham-mizaj ho ke vo bargasht-agi kare
daftar men jis ke fard-e-muqaddar lagaiye
daulat jo mujh gharib ki luuti hai aap ne
kya kijiyega hissa-e-lashkar lagaiye
jatanon ki janen liin hain unhen khun-baha mile
puura hisab dekh ke daftar lagaiye
us gul ki aa hi jaegi khushbu dimagh men
chaliye riyaz-e-ishq men chakkar lagaiye
ifsha kiya jo ishq to jhunjhla ke bole vo
likhva ke ishtihar ye ghar ghar lagaiye
sau ja se dil phata hai kaleja hai chaak chaak
paivand phaad phaad ke chadar lagaiye
phir uth ke tere haath se katvaiye gala
kyun-kar dobara jism men phir sar lagaiye
saath is qadar hain us shah-e-khuban ke sarfarosh
barson hisab kasrat-e-lashkar lagaiye
kahte hain lakht-e-dil ko vo bazar-e-husn men
sauda ye mere urdu se bahar lagaiye
mujh se lagavat aap ki shamshir karti hai
marta huun us pe is ko mire sar lagaiye
sailab-e-ashk ne mire raste kiye hain band
kashti manga ke muttasil-e-dar lagaiye
khilat shahid-e-naz ko bhijvate hain javab
kashti men pahle phulon ki chadar lagaiye
pahuncha ke khat halal hua hai ye ai ‘sharaf’
ankhon se le ke khun-e-kabutar lagaiye
Leave a Reply