tirchhi nazar na ho taraf-e-dil to kya karun
laila ke na-pasand ho mahmil to kya karun
thahre na khun-baha su-e-qatil to kya karun
haq ho jo khud-bakhud mira batil to kya karun
ik rang ko jahan men nahin koi manta
har rang men rahun na main shamil to ya karun
pisvaun be-gunah jo dil ko hina ke saath
pursan-e-hal ho koi aadil to kya karun
parvana hone ki bhi ijazat nahin mujhe
alam-fareb hai tiri mahfil to kya karun
jaata gulu-burida bhi ud kar gulon ke paas
baazu gaya hai tod ke bismil to kya karun
laila ye kah ke jalva dikhati hai qais ko
udne lage jo parda-e-mahmil to kya karun
khud chahta huun zabt karun dard-e-shauq main
dil hi mira na ho mutahammil to kya karun
munh chuum luun ki gird phirun daud daud ke
ai dil jo haath rok le qatil to kya karun
dam rah-e-shauq-o-zauq men leta nahin kahin
is par bhi tai na ho jo ye manzil to kya karun
kyun-kar na jabr dil pe karun apne ikhtiyar
rahat men aa pade koi mushkil to kya karun
ik ik se puchhte hain vo aina dekh kar
maashuq paun pyaar ke qabil to kya karun
de duun main rah-e-ishq men jaan us ke naam par
na-char huun na ho koi saail to kya karun
tanke jigar ke zakhm men kyunkar lagane duun
gul tere baagh ka ho muqabil to kya karun
aane ko mana karte ho achchha na aunga
ye to kaho na maane mira dil to kya karun
shayad mujhe jamal dikha de vo ai kalim
nazzare ka na huun mutahammil to kya karun
mar jaun duub kar ‘sharaf’ us paar yaar hai
kashti na ho koi lab-e-sahil to kya karun
Leave a Reply