aisī vahshat pe maiñ qurbān bhī ho saktā huuñ
maiñ jo dariyā huuñ bayābān bhī ho saktā huuñ
hañsne rone ke alāva bhī rasā.ī hai mirī
maiñ agar chāhūñ to hairān bhī ho saktā huuñ
maiñ ki jis ḳhaak meñ pāmāl huā jaatā huuñ
maiñ isī ḳhaak pe ehsān bhī ho saktā huuñ
mujh pe mushkil na banā guzrī huī yādoñ ko
maiñ tujhe bhuul ke āsān bhī ho saktā huuñ
itne ġham dete hue ye bhī na sochā us ne
maiñ kisī ġham meñ pareshān bhī ho saktā huuñ
maiñ ki jis shauq meñ ābād huuñ ‘maqsūd’ ‘vafā’
maiñ usī shauq meñ vīrān bhī ho saktā huuñ