Rasheed Lakhnavi
hai andhera to samajhta huun shab-e-gesu hai
band ankhen hain ki ai yaar nazar men tu hai
dam-ba-dam kahte ho kyuun fikr men nahaq tu hai
gham ko kya kaam mira sar hai mira zaanu hai
is liye dil ke talab karne pe main rota huun
tar na ho aap ka daman ki ye ik aansu hai
aaj phir kal ki tarah hijr ki raat aati hai
dekhiye kya ho vahi dil hai vahi pahlu hai
ek muddat ka hai qissa kisi janib dil tha
ye nahin yaad ye pahlu hai ki vo pahlu hai
yad-e-ayyam-e-guzishta men na taḌpun kyunkar
ki abhi tak mire bistar men tumhari lau hai
mujh ko mane.a hai adab zab.h men kyunkar taḌpun
o sitamgar mire siine pe tira zaanu hai
hai ayaan dil ke dhaḌakne se kisi ki ulfat
aj-kal aap ke pahlu men mira pahlu hai
ho gaya hai jo mire dil ka satana manzur
aj-kal aap ki har baat men ik pahlu hai
tark-e-ulfat to kuchh asan nahin mushkil hai ‘rashid’
roko aahon ko zara in pe agar qaabu hai
Leave a Reply