Ek Talwar Ki dastan

Afzal Ahmad Syed

ye aine ka safar-nama nahin

kisi aur rang ki kashti ki kahani hai

jis ke ek hazar paanv the

ye kuen ka thanda paani nahin

kisi aur jagah ke jangali chashme ka bayan hai

jis men ek hazar mashalchi

ek dusre ko dhund rahe honge

ye juton ki ek narm jodi ka moamla nahin

jis ke talvon men ek janvar ke narm

aur uupri hisse men us ki maada ki khaal ham-juft ho rahi hai

ye ek iint ka qissa nahin

aag paani aur mitti ka faisla hai

ye ek talvar ki dastan hai

jis ka dasta ek aadmi ka vafadar tha

aur dhad ek hazar adamiyon ke badan men utar jaata tha

ye bistar par dhuli dhulai ediyan ragadne ka tazkira nahin

ek qatl-e-am ka halfiya hai

jis men ek aadmi ki ek hazar baar jan-bakhshi ki gai