riya-kariyon se musallah ye lashkar mujhe maar denge
main bach bhi gaya to na.e hamla-avar mujhe maar denge
ba-zahir ye ahl-e-mohabbat hain lekin munafiq bahut hain
ye ik roz dam-e-mohabbat men la kar mujhe maar denge
main apni hi avaz apne hi saa.e se Darne laga huun
aur ab ḳhauf ye hai ki mere yahi Dar mujhe maar denge
isi men amaan hai ki main un ke chehre palaT kar na dekhun
palaTne ki surat men ye kina-parvar mujhe maar denge
main hone ko apne hi batin men ru-posh ho ja.un lekin
mire apne ahbab shak ki bina par mujhe maar denge
ye kamil yaqin hai ki jis din bhi apne muqabil men aaya
miri zaat men morcha-band ḳhud-sar mujhe maar denge
‘hasan’ ab khule asmanon men parvaz karna paḌegi
vagarna ye ḳhisht-e-havas se bane ghar mujhe maar denge
Leave a Reply