Is Tarah Se Tarjumani Kar Gaya

is tarah se tarjumānī kar gayā

mere ashkoñ ko vo paanī kar gayā

us ne chehre se haTā Daalā naqāb

aur merī ġhazleñ purānī kar gayā

rakh gayā vo apne kapḌe sūkhne

dhuup bhī kitnī suhānī kar gayā

bhuul jaane kī qasam denā terā

yaad aane kī nishānī kar gayā

do ghaḌī ko paas aayā thā koī

dil pe barsoñ hukmarānī kar gayā

jis pe maiñ īmān le aayā ‘asad’

mujh se vo hī be-īmānī kar gayā

Leave a Comment