Subhan Asad
is tarah se tarjumani kar gaya
mere ashkon ko vo paani kar gaya
us ne chehre se haTa Daala naqab
aur meri ghazlen purani kar gaya
rakh gaya vo apne kapḌe sukhne
dhuup bhi kitni suhani kar gaya
bhuul jaane ki qasam dena tera
yaad aane ki nishani kar gaya
do ghaḌi ko paas aaya tha koi
dil pe barson hukmarani kar gaya
jis pe main iman le aaya ‘asad’
mujh se vo hi be-imani kar gaya
Leave a Reply