Ahmad Ali Barqi Azmi
vo bhuul gaya mujh se barson ki shanasai
lamhon ne khata ki thi sadiyon ne saza paai
halat ka ab main huun khamosh tamashai
bhaai se tadapta hai milne ke liye bhaai
tasvir tasavvur hi bas ek sahara hai
furqat ne bana daala us ki mujhe saudai
jazbat the be-qabu karta bhi to kya karta
us rashk-e-gul-e-tar ki jab yaad mujhe aai
yadon ke jharokon se hasrat hai use dekhun
pahle tha jo ankhon ki meri kabhi binai
vo dekhna mud mud kar us ka mujhe hasrat se
baaqi na rahi meri jab quvvat-e-goyai
jo tar-e-rag-e-jan par har-vaqt ghazal-khvan thi
ras gholti hai ab bhi kanon men vo shahnai
duzdida-nigahi men kho jaata tha dil jin ki
un jhiil si ankhon ki yaad aai hai gahrai
deta hai koi dastak aa aa ke dar-e-dil par
kaate nahin katti hai ‘barqi’ shab-e-tanhai
Leave a Reply