Hasan Rizvi
mohabbat ka ajab zaviya hai
hava.en char-su aur ik diya hai
ham ahl-e-dard ḳhud se puchhte hain
vatan ko ham ne ab tak kya diya hai
sitamgar ke sitam itne baḌhe hain
labon ko aaj ham ne si liya hai
achanak bol uThe divar-o-dar bhi
ye kis ka naam main ne le liya hai
tumhare ḳhvab aḳhir kya hue hain
haqiqat-ashna kis ne kiya hai
tumhari pyaas kyuun bujhti nahin hai
ye kis ki ok se paani piya hai
miri ankhon se aansu kis ne ponchhe
gareban chaak ye kis ne siya hai
sabhi ko lauTna hai ik na ik din
‘hasan’ duniya men kaun itna jiya hai
Leave a Reply