vus.at-e-chashm ko andoh-e-basarat likkha
main ne ik vasl ko ik hijr ki halat likkha
main ne likkha ki saf-e-dil kabhi ḳhali na hui
aur ḳhali jo hui bhi to malamat likkha
ye safar paanv hilane ka nahin aankh ka hai
main ne is baab men rukne ko masafat likkha
likhne valon ne to hone ka sabab likkha hai
main ne hone ko na hone ki vazahat likkha
ashk agar sab ne likhe main ne sitare likkhe
ajizi sab ne likhi main ne ibadat likkha
main ne ḳhushbu ko likha dastaras-e-gumshudagi
rang ko fasla rakhne ki ri.ayat likkha
zaḳhm likhne ke liye main ne likhi hai ghaflat
ḳhuun likhna tha magar main ne hararat likkha
main ne parvaz likhi hadd-e-falak se aage
aur hai bal-o-pari ko bhi nihayat likkha
husn-e-goya.i ko likhna tha likhi sargoshi
shor likhna tha sau azar-e-sama.at likkha
itne davon se guzar kar ye ḳhayal aata hai
‘azm’ kya tum ne kabhi harf-e-nadamat likkha
Leave a Reply