garche dil men hi sada jan-e-jahan rahte ho
par ba-zahir nahin ma.alum kahan rahte ho
shukr-lillah ki abhi kaam tumhen baaqi hai
le chuke dil to vale darpa-e-jan rahte ho
aa nikalte ho kidhar bhuul ke be-ḳhvahish-e-dil
ab bhi jaao vahin har roz jahan rahte ho
ai ḳhush-abru koi phir Dhab pe chaḌha taaza shikar
yuun jo har vaqt liye tir-o-kaman rahte ho
gar kabhi aa.e ‘asar’ paas hue vohin udaas
ḳhush shab-o-roz paḌe auron ke haan rahte ho
Leave a Reply