bujh gaya raushan savera maan tire jaane ke baa’d
chha gaya har su andhera maan tire jaane ke baa’d
gham ka badal hai ghanera maan tire jaane ke baa’d
dam ghuta jaata hai mera maan tire jaane ke baa’d
kis ke chehre men talashun tere chehre ki jhalak
kis ke anchal men milegi teri mamta ki mahak
kis ki baton men sunungi tere lahje ki khanak
kis sitare men basegi teri ankhon ki chamak
dhundhti huun aks tera maan tire jaane ke baa’d
dam ghuta jaata hai mera maan tire jaane ke baa’d
phone par kis ko sunaungi main apna hal-e-zar
kis ki baten sun ke aaega mire dil ko qarar
kaun ponchhega mire bahte hue ashkon ki dhaar
kaun paani padh ke dega hoga jab mujh ko bukhar
dil men vahshat ka basera maan tire jaane ke baa’d
dam ghuta jaata hai mera maan tire jaane ke baa’d
kaun ab mere liye dast-e-dua phailaega
kis tarah afat ka sadqa utara jaega
kaun marham zakhm-e-jan par pyaar se rakh paega
dard ki shiddat men meri piith ko sahlaega
ranj-o-gham ne mujh ko ghera maan tire jaane ke baa’d
dam ghuta jaata hai mera maan tire jaane ke baa’d
ai karachi ye bata ab kis se milne aungi
kis ki banhon men simat kar chain o sukh main paungi
maan tiri furqat ka sadma main nahin sah paungi
kis tarah yadon se teri apna dil bahlaungi
kal-adam maike ka phera maan tire jaane ke baa’d
dam ghuta jaata hai mera maan tire jaane ke baa’d
tu to bagh-e-khuld men mehman-e-yazdan ho gai
aur yahan par meri duniya pal men viran ho gai
dafatan izn-e-safar par khalaq hairan ho gai
zindagi bhi ek lamha ko pareshan ho gai
ghar men khamoshi ka dera maan tire jaane ke baa’d
dam ghuta jaata hai mera maan tire jaane ke baa’d
maghfirat ki tujh pe maula ab faravani kare
jannat-ul-firdaus men bhi rahmat arzani kare
sabza-e-naurasta us ghar ki nigahbani kare
asman teri lahad par shabnam afshani kare
haq ada kar paanv tera maan tire jaane ke baa’d
dam ghuta jaata hai mera maan tire jaane ke baa’d
Leave a Reply