charḳh bhi chhu len to jaana hai isi miTTi men
mustaqil apna Thikana hai isi miTTi men
jin ke daman pe kabhi chand-sitare chamke
dafan un ka bhi fasana hai isi miTTi men
be-amal haath lagae bhi to ḳhali jaae
haan jafa-kash ka ḳhazana hai isi miTTi men
is tarah chal ki ye pamal na hone paae
be-ḳhabar aab hai daana hai isi miTTi men
ham-vatan ḳhak-e-vatan kyuun na ho pyari ki hamen
ba.ad-az-marg bhi jaana hai isi miTTi men
log kal kah ke tujhe yaad karenge ‘aḳhlaq’
shair-e-faḳhr-e-zamana hai isi miTTi men
Leave a Reply