tamam galiyon men matam bapa tha jangal ka
yahan zarur koi silsila tha jangal ka
likhi thiin vahshaten sahra ki meri ankhon men
kitab-e-dil men varaq khul raha tha jangal ka
hamare shahron men ab roz hota rahta hai
vo vaqi.a jo kabhi vaqi.a tha jangal ka
vo is taraf ki pahaḌi pe miThe jharne the
pa darmiyan men rasta ghana tha jangal ka
mujh ek shahr men aisa bhi tha udaas koi
hamesha mujh se pata puchhta tha jangal ka
kisi ke saath ne insan bana diya hai ise
vagarna dil ye kabhi bheḌiya tha jangal ka
jahan pe ḳhatm thi insaniyat ki had ‘at.har’
vahan pe dekha to ik rasta tha jangal ka
Leave a Reply