sang kisi ke chalte jaa.en dhyan kisi ka rakkhen
ham vo musafir saath apne saman kisi ka rakkhen
rang-birange manzar dil men anhken ḳhali ḳhali
ham avaz kisi ko den imkan kisi ka rakkhen
ik jaise hain dukh sukh sab ke ik jaisi ummiden
ek kahani sab ki kya unvan kisi ka rakkhen
din bhar to ham paḌhte phiren apni ghazlen nazmen
raat sirhane apne ham divan kisi ka rakkhen
ukhḌi ukhḌi ulTi sidhi ‘shaz’ hain us ki baten
aao kuchh din is dil ko mehman kisi ka rakkhen
Leave a Reply