hathon ki lakiron ka likha kaaT rahe hain
ham apne gunahon ki saza kaaT rahe hain
miTti nahin tariḳh se koi bhi ibarat
tariḳh likhegi ki likha kaaT rahe hain
hai aaj ki faslon men adavat hi adavat
kya boya tha ham ne yahan kya kaaT rahe hain
ham phuul hain mahkenge jidhar ja.enge lekin
is baagh men rahne ki saza kaaT rahe hain
gaate the kabhi vo bhi mohabbat ke tarane
mauqa jo mila hai to gala kaaT rahe hain
asan banana hai mohabbat ki Dagar ko
chun chun ke so ham lafz-e-vafa kaaT rahe hain
Leave a Reply