main ab ukta gaya huun furqaton se
nikalun kis tarah tujh ko ragon se
juda.i taak men baiThi hui thi
mohabbat kar rahe the mashvaron se
tujhe main ne mujhe tu ne ganvaya
magar ab fa.eda in tazkaron se
dua.en ho ga.iin na rad tumhari
main qaa.il hi nahin huun falsafon se
mire sab hausle maare ga.e hain
tumhari kam-sini ke faislon se
tumhari yaad ḳhuni hai miri bhi
laḌen ham kis tarah in bheḌiyon se
vo vahshat hai ki hai vo sog barpa
main hansta tak nahin huun qahqahon se
tumhare gham ki jaan ko aa ga.e hain
nahin shayad magar haan kuchh dinon se
hamare beach ik divar hai ab
ise uncha karenge nafraton se
Leave a Reply