Ambarin Salahuddin
ubharti hai mire mathe ki silvat men
shikan dhage ke khinchne ki
udhede ja rahi huun
main bhi din-bhar se
mujhe jab yaad aata hai
ki main kitna ulajhti thi
miri naani har ik kapde ko
chahe vo naya hi kyuun na ho
ik baar kam se kam
na jab tak apne hathon se udheden
aur si len
tab talak un ko sukun aata na tha
main aksar sochti thi
naqs kya hota hai akhir
har nae jode ke silne men
bhala dhage ke pichhe chhup ke akhir
kaun se aise masail hain
jinhen main phir udhede ja rahi huun
aur apne haath se phir se silai kar ke
apne taur apne dhab se
is kapde men
kaise rang bharti ja rahi huun
is tarah kuchh pal safar to
meri apni zaat ke hamrah tai paaya
mujhe us pal men khud men
meri maan naani miri daadi
har ik chehra nazar aaya
Leave a Reply