Poet
main na vo huun ki tanik ghusse men Tal ja.unga
hans ke tum baat karoge main bahal ja.unga
ham-nashin kijiyo taqrib to shab-bashi ki
aaj kar nashsha ka hiila main machal ja.unga
dil mire zo.af pe kya rahm tu khata hai ki main
jaan se ab ki bacha huun to sambhal ja.unga
sair us kuche ki karta huun ki jibril jahan
ja ke bola ki bas ab aage main jal ja.unga
tang huun main bhi ab is jiine se ai ji na ruka
ja nikal ja jo tu kahta hai nikal ja.unga
shor-e-mahshar se hai parva mujhe kya ai vaa.iz
jab ki ham-rah liye dil sa ḳhalal ja.unga
shoḳhi se pahunchiye juun hind men tuuti ‘qa.em’
aage ‘sauda’ ke main le kar ye ghazal ja.unga
Leave a Reply