Anwar Masood
darmiyan gar na tira vada-e-farda hota
kis ko manzur ye zahr-e-gham-e-duniya hota
kya qayamat hai ki ab main bhi nahin vo bhi nahin
dekhna tha to use duur se dekha hota
kasa-e-zaḳhm-talab le ke chala huun ḳhali
sang-reza hi koi aap ne phenka hota
falsafa sar-ba-gareban hai baḌi muddat se
kuchh na hota to ḳhuda jaane ki phir kya hota
ham bhi nau-ḳhez shuaon ki bala.en lete
apne zindan men agar koi daricha hota
aap ne hal-e-dil-e-zar to puchha lekin
puchhna tha to koi us ka mudava hota
dast-e-muflis se tahi-tar hai safina ‘anvar’
is pahunchne se to sahil pe na pahuncha hota
Leave a Reply