Bano Tahira Sayeed
mujhe taḌpa ke sharmata to hoga
kiye par apne pachhtata to hoga
na lagta hoga dil bagh-e-iram men
kabhi ghar mera yaad aata to hoga
shikast-e-zindagi de kar mujhe yuun
vo fateh ban ke itrata hoga
kabhi yaad aa hi jaate honge vo din
tera dil bhi taḌap jaata to hoga
nahin tark-e-mohabbat itna asan
tasavvur mera rulvata to hoga
sukun-e-zindagi men hogi halchal
dil-e-maghmum ghabrata to hoga
tabassum chhin gaya hoga labon se
vo dil hi dil men gham khata to hoga
bahar-e-rafta aati hogi jab yaad
junun men sar ko Takrata to hoga
ba-zahir ḳhush sahi lekin kahan ḳhush
banavaT karke thak jaata to hoga
vafa.en meri yaad aati na hongi
tiri ankhon men ashk aata hoga
ye maana be-muravvat sang-dil hai
magar patthar pighal jaata to hoga
na jaani bevafa ne qadr-e-ne.amat
mujhe ab kho ke pachhtata to hoga
dil-e-mahzun men Tiis uThti na hogi
ḳhayal-e-‘tahira’ aata to hoga
Leave a Reply