Meer Hasan
kal jo tum idhar se guzre ham nazar kar rah gae
ji men tha kuchh kahiye lekin aah dar kar rah gae
jab na kuchh bas chal saka apna to phir hasrat se haae
dekh kar munh ko tire ik aah bhar kar rah gae
sar bahut patka qafas men apna ham ne ham-safir
kui na pahuncha daad ko fariyad kar kar rah gae
nama-bar ki ya kabutar ki ki dil ki rakhiye aas
apne to yaan se gae jo vaan vo mar kar rah gae
kal kisi ka zikr-e-khair aaya tha majlis men ‘hasan’
is dil-e-betab par ham haath dhar kar rah gae
Leave a Reply