us ke kuche men gaya main so phir aaya na gaya
main vahan aap ko DhunDa to main paaya na gaya
gum hua dil mire pahlu se ki paaya na gaya
shayad us kuche men ja us se phir aaya na gaya
dam-ba-ḳhud ho ke mua us ki nazakat ke sabab
ah-o-nala bhi mujhe us ko sunaya na gaya
us ne ik roz men sau baar rulaya mujh ko
mujh se par us but-e-ḳhush-ḳhu ko manaya na gaya
ba.ad ik umar ke kya tujh se kahun ai ‘ghamgin’
hal-e-dil us ne jo puchha to sunaya na gaya
Leave a Reply