Poet
dil men hujum-e-shauq-o-tamanna liye hue
jaata huun teri bazm se kya kya liye hue
nairangi-e-jamal hai jalva-gah-e-ḳhayal
us dil men huun main husn ki duniya liye hue
ummid-e-zist us ko ho kya jis ke vaste
aa.e payam-e-maut masiha liye hue
vo jalva-gah-e-naz ho aur chashm-e-shauq main
huun kis qadar main dil men tamanna liye hue
ye muskura ke kis ne nazar dil pe Daal di
har har taḌap hai shan-e-tamanna liye hue
arman ki fikr kis ko tamanna ka zikr kya
dil ḳhud hai ik nazar ka sahara liye hue
Darne lage hain ab vo nazar se miri ‘munir’
goya sukut bhi hai taqaza liye hue
Leave a Reply