Poet
jo apni chashm-e-tar se dil ka paara chhoḌ jaata hai
vahi mahfil men gham ka isti.ara chhoḌ jaata hai
myaan ghurbat men har ik be-sahara chhoḌ jaata hai
andhera ho to saaya bhi hamara chhoḌ jaata hai
jidhar jalve bikharte hain udhar karta nahin nazren
shikast-e-ḳhvab ke Dar se nazara chhoḌ jaata hai
mujhe sairab karta ja agar tu ik samundar hai
faqat pyase pe kyuun ilzam saara chhoḌ jaata hai
har ik hai mahv-e-hairat vo karishma-saz hai aisa
sar-e-mahfil jo ik rangin nazara chhoḌ jaata hai
main akasr kashti-e-mauj-e-bala par sair karta huun
mujhe sahil pe us ka ik ishara chhoḌ jaata hai
ajab hai mera mohsin bhi ki jaate vaqt vo akasr
miri palkon pe ik raushan sitara chhoḌ jaata hai
Leave a Reply