Jis Tarah Bhi Barsar-E-Paikar Hona Tha Hue

jis tarah bhī barsar-e-paikār honā thā hue

zindagī kā ham ko da.ave-dār honā thā hue

tere jalvoñ tak rasā.ī ke liye āñkheñ na thiiñ

phir bhī terā tālib-e-dīdār honā thā hue

dushmanī ke naam par to ho chukā maidān saaf

dostoñ ko biich kī dīvār honā thā hue

yuuñ to sab ko e’timād apne paroñ par thā magar

jin parindoñ ko ufuq ke paar honā thā hue

apne is anjām kā shikva bhī ham kis se kareñ

kārobār-e-ishq meñ be-kār honā thā hue

dekhte hī rah ga.e sab hāsidān-e-nek-nām

jis qabīle kā hameñ sardār honā thā hue

gum rahe tārīkiyoñ meñ ‘shān’ is ke bāvajūd

ham ko āḳhir nuur kā mīnār honā thā hue

Leave a Comment