Shan Bharti
jis tarah bhi barsar-e-paikar hona tha hue
zindagi ka ham ko da.ave-dar hona tha hue
tere jalvon tak rasa.i ke liye ankhen na thiin
phir bhi tera talib-e-didar hona tha hue
dushmani ke naam par to ho chuka maidan saaf
doston ko biich ki divar hona tha hue
yuun to sab ko e’timad apne paron par tha magar
jin parindon ko ufuq ke paar hona tha hue
apne is anjam ka shikva bhi ham kis se karen
karobar-e-ishq men be-kar hona tha hue
dekhte hi rah ga.e sab hasidan-e-nek-nam
jis qabile ka hamen sardar hona tha hue
gum rahe tarikiyon men ‘shan’ is ke bavajud
ham ko aḳhir nuur ka minar hona tha hue
Leave a Reply