Ayaz Rasool Nazki
chhaten uḌi hain daraḌen paḌen makanon men
sitam ki ghaas ugi hai nigar ḳhanon men
lahu lahu tha badan us ka haath TuuTe the
hina hina vo pukari thi astanon men
gharon men aaj vo karb-o-bala ka manzar tha
ki sahme sahme parinde the ashiyanon men
vo jin ke naam pe niklengi kal ki ta.abiren
kiye hain ḳhvab muqaffal vo qaid ḳhanon men
vo jis ka vaar muassar tha zarb kaari thi
khaḌa hua tha vo qatil bhi pasbanon men
zamin pe zulm bahut hai ḳhuda se kah dete
guzar hamara agar hota asmanon men
Leave a Reply