aziyyaton se nikalne ka mashvara deti
main us ki thi to nahin phir bhi hausla deti
kisi azaab se kam to nahin hai ḳhush rahna
dua ke naam pe kyuun us ko bad-dua deti
chhupa bhi leti mire bhed ko agar bil-farz
hava ka kya hai koi aur gul khila deti
baja ki sahl na tha us ka ham-safar hona
kam az kam us ko palaTne ka rasta deti
jo mujh se ishq ke qisse sunata phirta tha
kahin vo milta to main us ko aa.ina deti
mire ḳhuda koi masraf to hota ashkon ka
fasil-e-shahr ki tahrir hi miTa deti
ḳhuda gavah ki sar se jhaTak ke dekh liya
nahin tha bas men vagarna use bhula deti
main us ki ḳhaas inayat se bach ga.i huun ‘qamar’
vagarna ḳhalq-e-ḳhuda to mujhe miTa deti
Leave a Reply