dil men un ki yadon ke jab diye jalate hain
daman-e-taḳhayyul par phuul muskurate hain
tum shikast-e-dil par kyon is qadar pareshan ho
a.inon ka kya vo to yuun hi TuuT jaate hain
aap se to qurbat men fasle rahe qaa.em
log to qarib aa kar raah bhuul jaate hain
raat yuun guzarti hai kashmakash ke maron ki
ik diya jalate hain ik diya bujhate hain
jab nigah paḌti hai zindagi ke chehre par
ankhen DabDabati hain honT thartharate hain
yaad se muzayyan hai aaj bhi dil-e-‘sumbul’
log biite lamhon ko kis tarah bhulate hain
Leave a Reply