abid-malik

Aakhiri Bar Zamane Ko Dikhaya Gaya Hun

akhiri baar zamane ko dikhaya gaya huun

aisa lagta hai ki main daar pe laaya gaya huun

sab mujhe DhunDne nikle hain bujha kar ankhen

baat nikli hai ki main khvab men paaya gaya huun

ped bhi zard hue jaate hain mujh se mil kar

jaane main kaisi udasi se banaya gaya huun

raah takti hai kisi aur jagah khush-khabari

main magar aur hi raste se bulaya gaya huun

kitni mushkil se mujhe dhuup ne sarsabz kiya

kitni asani se barish men jalaya gaya huun

More Poems

Leave a Comment