akhtar-ul-iman

Gungi Aurat

kyuun hairat se takti hai ek ik chehre ko

kya tujh ko shikva hai teri goyai ki taqat

chhin ke qudarat ne be-insafi ki hai?

kya tujh ko ehsas hai tere paas agar guftar ki neamat hoti

to is charon janib phaili hathiyaron ki duniya

siina dahla dene vaale tayyaron ki insan-kush avazen

avazen jin men insan ki ruuh shabana roz dabi jaati hai

mahshar-khez avazen kal-purzon ki jin se nafsi-nafsi ka aalam paida ho kar

din par din ifrit ki surat men badhta jaata hai

in avazon ki haibat-naki par vavaila karti

tu avaz uthati us fashi aur taassub phailane vaale unsur ko badhta pa kar

jo hubb-ul-vatani ke naam pe insan-kush hota jaata hai

tu un rujhanat ki khuub mazammat karti

un se ladti jo is duniya ko pichhe le jaane men koshan hain

‘mazhab aur tahzib’

‘saqafat’ aur ‘taraqqi’ kah kar rajat-parvar ho jaate hain

le main tujh ko apni goyai deta huun!

ye mere kaam nahin aai kuchh

main aisa buzdil huun jo har be-insafi ko chupke chupke sahta hai

jis ne ‘maqtal’ aur ‘qatil’ donon dekhe hain

lekin danai kah kar

apni goyai ko gunga kar rakha hai!

More Poems

Leave a Comment