jalva jo tire ruḳh ka ehsas men Dhal jaa.e
is alam-e-hasti ka aalam hi badal jaa.e
un mast nigahon ka ik daur jo chal jaa.e
ham dard ke maron ki taqdir badal jaa.e
masruf-e-ibadat ka yuun ḳhatm ho afsana
sar ho tiri chaukhaT pe dam mera nikal jaa.e
tu laakh bacha daman dar se na uThunga main
un men se nahin huun main Taale se jo Tal jaa.e
ai jan-e-karam mujh par ek chashm-e-karam kar de
aisa na ho divana qadmon pe machal jaa.e
hasrat bhari ankhon men ik pal ke liye aa ja
dekhe jo teri surat divana bahal jaa.e
tu aag mohabbat ki bhar de miri nas nas men
har zarra mire dil ka is aag men jal jaa.e
bijli tire jalvon ki gir jaa.e kabhi mujh par
ai jaan miri hasti is aag men jal jaa.e
ai charagaro dekho bimar-e-mohabbat huun
tadbir karo aisi dil jis se bahal jaa.e
tu jazb-e-mohabbat men kar le vo asar paida
jis samt nazar uTThe ik tiir sa chal jaa.e
pamal-e-rah-e-ulfat ho ja.un mohabbat men
vo shoḳh agar mujh ko qadmon se masal jaa.e
taqdir kare ehsan yuun ba.ad-e-‘fana’ mujh par
ḳhak-e-dar-e-janana munh par mire mal jaa.e
Leave a Reply