ghar jo arsa laga banane men
der tum ne na ki jalane men
kyon tha aḳhir itaab ye mujh par
kya mila tujh ko yuun satane men
muntazir muztarib tha dil mera
der tum ne laga di aane men
ek tum par hi kyon ye dil aaya
aur bhi log hain zamane men
aarzu intizar ummiden
ab yahi rah gaya fasane men
tum jo chahat ki baat karte ho
tum to mahir ho dil dukhane men
lo usi ka kiya dhara hai ye sab
zikr jis ka nahin fasane men
yaan pazira.i jab nahin milti
afiyat hai yahan se jaane men
umr guzri kamane men izzat
tum ne pal bhar liya ganvane men
kyon hai darpesh tum ko dushvari
mujh ko ik baar phir manane men
ab to bhaa.i se ghair hain behtar
kaisa dastur hai zamane men
rakhti thi chiḌiya saint ke bachche
aa gaya saanp ashiyane men
Leave a Reply