Ghar Jo Arsa Laga Banane Mein

ghar jo arsa lagā banāne meñ

der tum ne na kī jalāne meñ

kyoñ thā āḳhir itaab ye mujh par

kyā milā tujh ko yuuñ satāne meñ

muntazir muztarib thā dil merā

der tum ne lagā dī aane meñ

ek tum par hī kyoñ ye dil aayā

aur bhī log haiñ zamāne meñ

aarzū intizār ummīdeñ

ab yahī rah gayā fasāne meñ

tum jo chāhat kī baat karte ho

tum to māhir ho dil dukhāne meñ

lo usī kā kiyā dharā hai ye sab

zikr jis kā nahīñ fasāne meñ

yaañ pazīrā.ī jab nahīñ miltī

āfiyat hai yahāñ se jaane meñ

umr guzrī kamāne meñ izzat

tum ne pal bhar liyā gañvāne meñ

kyoñ hai darpesh tum ko dushvārī

mujh ko ik baar phir manāne meñ

ab to bhaa.ī se ġhair haiñ behtar

kaisā dastūr hai zamāne meñ

rakhtī thī chiḌiyā saiñt ke bachche

aa gayā saañp āshiyāne meñ

Leave a Comment