duniya ko jab nazdiki se dekha hai
tab samjha ye sab kuchh khel-tamasha hai
hathon ki do-char lakiren paḌh kar vo
mujh se bola aage sab kuchh achchha hai
us se bas ik baar mila par hairan huun
dil men tab se ghar kar ke vo baiTha hai
kaghaz par dil ki tasvir bana.i jab
us ne puchha ye kis shai ka naqsha hai
soch raha huun main is ka sauda kar duun
us ki yadon ka jo dil men malba hai
donon pahlu men hi haar chhipi is men
mere hathon men ab ye jo sikka hai
is ḳhatir main roz mashaqqat karta huun
asani se kya hasil ho paata hai
jab qudrat ne thoḌa aaj navaza to
saare mujh se puchhe hain tu kaisa hai
‘mit’ yahan apne to naam ke apne hain
an-janon se rishta dil ka gahra hai
Leave a Reply