falak ka har sitara raat ki ankhon ka moti hai
jise shabnam sahar ki shoḳh kirnon men piroti hai
vahi masti miri dhaḌkan hai mere dil ki joti hai
jo teri nilgun ankhon men gahri niind soti hai
zamin-e-dard men chahat vafa ke biij boti hai
to kya kya javedan lamhat ki taḳhliq hoti hai
taḌapti hai mire siine men aise aarzu teri
koi jogan ghane jangal men jaise chhup ke roti hai
ye meri soch har zarre men suraj ki tamanna.i
ye dil ki raushni ko lamhe lamhe men samoti hai
ga.e vaqton ki pahna.i chhalak jaati hai ankhon se
andheri raat men jab qatra qatra os roti hai
kahan milti hai vo rahat na.e yaḳh-basta chehron men
purane doston se mil ke jo taskin hoti hai
Leave a Reply