Ahmad Adil
un ke qisse agar bayan hote
raaz saare tabhi ayaan hote
tum ko aate hunar jo rahzan ke
bas tumhi mir-e-karvan hote
bair ham se sahi magar socho
ham na hote to tum kahan hote
zindagi vo jagah dikha de ab
tujh ko paate to ham jahan hote
un ki mahfil men dil nahin lagta
jab vo auron men shadman hote
ye mukammal agar jahan hota
phir khalaon men kyuun jahan hote
soch men qurbaten agar hotin
fasle yuun na darmiyan hote
tum hi gosha-nashin the ‘adil’
varna charche kahan kahan hote
Leave a Reply