Aurang Zeb
nihatte aadmi pe baḌh ke ḳhanjar taan leti hai
mohabbat men na paḌ jaana mohabbat jaan leti hai
use ḳhamosh dekhun to suna.i kuchh nahin deta
dikha.i kuchh nahin deta nazar jab kaan leti hai
udasi ashna hai is qadar aahaT se meri ab
jahan se bhi guzarta huun mujhe pahchan leti hai
ḳhushi to de hi deti hai tiri duniya mujhe la kar
magar badle men vo us ke mira iman leti hai
bas ik lamha lagati hai ḳhushi aa kar guzarne men
udasi aa.e to sadiyon ki miTTi chhan leti hai
barabar baanT deti hai vo sansen ḳhak-zadon men
na-jane zindagi kis ki dukan se bhaan leti hai
isi ke saath chalti hai ye manzil par pahunchne tak
ye rah-e-gham jise apna musafir jaan leti hai
vo har machhli jo machhli ghar ki paidavar ho sahab
vo machhli ghar ko hi apna samundar maan leti hai
ham us ke haath pe rakh den zamin-o-asman la kar
magar vo ham faqiron ka kahan ehsan leti hai
sar-e-maqtal bikhar jaate hain is men Dubne vaale
mohabbat har qadam par ḳhuun ka tavan leti hai
agar bujhne se bachna hai to lau se lau jalao ‘zeb’
hava jalte charaghon se yahi paiman leti hai
Leave a Reply