Duniya-E-Rang-O-Bu Se Kinara Nahin Kiya

Pritpal Singh Betab

duniya-e-rang-o-bu se kinara nahin kiya

achchha kiya jo ham ne dikhava nahin kiya

ham jism ko bacha na sake gard se magar

ye to kiya ki ruuh ko maila nahin kiya

auron par apni zaat ki tarjih to baja

ham ne kuchh apne saath bhi achchha nahin kiya

chup-chap bahar aa ga.e rassa-kashi se ham

zahir kisi pe apna irada nahin kiya

bas Dubte ubharte rahe hain tamam umr

ham ne ubuur karb ka dariya nahin kiya

kuchh dhuup us ko chiir ke ham tak pahunch ga.i

kuchh ham par us daraḳht ne saaya nahin kiya

‘betab’ jankar sabhi kartabon ke the

kuchh baat thi jo ham ne tamasha nahin kiya