apna jaisa bhi haal rakkha hai
tere gham ko nihal rakkha hai
sha.eri kya hai ham ne jiine ka
ek rasta nikal rakkha hai
ham ne ghar ki salamti ke liye
ḳhud ko ghar se nikal rakkha hai
mere andar jo sar-phira hai use
main ne zindan men Daal rakkha hai
ek chehra hai ham ne jis ke liye
a.inon ka ḳhayal rakha hai
is baras ka bhi naam ham ne to
teri yadon ka saal rakkha hai
girte girte bhi ham ne hathon par
asman ko sambhal rakkha hai
kya ḳhabar shishagar ne kyuun ‘az.har’
mere shishe men baal rakkha hai
Leave a Reply