bais-e-tark-e-mulaqat batao to sahi
chahne vaala koi ham sa dikhao to sahi
kaisi hoti hai mohabbat nahin maalum tumhen
ek do din kahin dil tum bhi lagao to sahi
bevafai ki hai tohmat chalo maana ham ne
haan bhala ham se zara aankh milao to sahi
jaan de dunga magar tum ko na jaane dunga
uth ke pahlu se bhala tum mire jaao to sahi
nahin milne ki jo marzi hai na milna ham se
baat karna ki na karna magar aao to sahi
dekh lo jiite hain ya marte hain mushtaq sada
apni avaz zara un ko sunao to sahi
har tarah bigde hue baithe hain jaane ke liye
‘asman’ aaj koi baat banao to sahi