kaliyon ki tarah dhula dhula hai
vo jism shumal men bana hai
gul-bar hain zulf o shana us ke
qamat men vo tavil o dilruba hai
lamhon ke samundar men jaise
bahta hua chand aa raha hai
honTon se vo dekhta hai mujh ko
ankhon se mujhe pukarta hai
guzri hai ramon men umr meri
hirnon se mira muashiqa hai
‘jamshed’ sambhal ke us badan par
bas ḳhanda-e-surḳh ki rida hai
Leave a Reply