halat-e-hal main kya ro ke suna.un tujh ko
tu nazar aa.e to palkon pe biTha.un tujh ko
ḳhud ko is hosh men mad.hosh banane ke liye
ayat-e-husn paḌhun dekhta ja.un tujh ko
tu nahin manta miTTi ka dhuan ho jaana
to abhi raqs karun ho ke dikha.un tujh ko
kar liya ek mohabbat pe guzara main ne
chahta tha ki main puura bhi to aa.uun tujh ko
ab mira ishq dhamalon se kahin aage hai
ab zaruri hai ki main vajd men la.un tujh ko
kyuun kisi aur ki ankhon ka qasida likkhun
kyuun kisi aur ki mid.hat se jala.un tujh ko
ain mumkin hai tire ishq men zam ho ja.un
aur phir dhyan ki jannat men na la.un tujh ko
us ne ik baar mujhe pyaar se bola tha ‘sa.id’
mera dil hai kabhi siine se laga.un tujh ko
Leave a Reply