ik piili chamkili chiḌiya kaali aankh nashili si
baiThi hai dariya ke kinare meri tarah akeli si
jab main nasheb-o-rang-o-bu men utra us ki yaad ke saath
os men bhigi dhuup lagi hai narm hari lachkili si
kis ko ḳhabar main kis raste ki dhuul banun ya phuul banun
kya jaane kya rang dikha.e us ki aankh paheli si
tez hava ki dhaar se kaT kar kya jaane kab gir jaa.e
lahrati hai shaḳh-e-tamanna kachchi bel chameli si
kam raushan ik ḳhvab a.ina ik piila murjhaya phuul
pas-manzar ke sannaTe men ek nadi pathrili si
Leave a Reply